Articles pour la reforme des Religieux

S. FRANÇOIS DE SALES A M. LE PRINCE DE PIEDMONT, A ANNECY¹.

Articles pour la reforme des Religieux.

La despendance que les religieux ont de leurs abbez et prieurs commendataires engendre continuellement des procez, noyses, et riottes² scandaleuses entre eux. Il seroit donc peut-estre à propos de separer le lot et la portion des biens requis à l’entretien des religieux, monastere et eglise, d'avec le lot et la portion qui pourroit rester à l’abbé ou au prieur commendataire; en sorte que les religieux n'eussent rien à faire avec l’abbé, ny l’abbé avec eux, puisque chacun d’eux auroit son fait à part, comme on a fait tres-utilement à Paris dans les abbayes de Sainct-Victor et de Sainct-Germain. Par ce moyen les Supérieurs cloistriers auroient toute l’authorité convenable pour bien reformer les monasteres, réduisant la portion des religieux en communauté. On pourroit aussi changer les Supérieurs, par l’eslection, de trois ans en trois ans.

Et affin que la reformation se fist plus aysement, il seroit requis que cest ordre se mist premièrement à Talloires, où il y a desjà un bon commencement de reformation, et par après il faudrait sousmettre à Talloires tous les monasteres de l’Ordre de Sainct-Benoist, affin qu’on y installast la mesme reforme.

Mais quant aux monasteres de l’Ordre de Cisteaux, je ne vois pas qu’aucune reforme s’y puisse faire, sinon en y mettant des religieux Feuillans, comme on a fait à la Consolate de Turin, à Pigneroles, et en Abondance.

Il y a de plus des monasteres de Chanoines reguliers de Sainct-Augustin, qui n’ont pas moins besoin d’estre reformez ; ce qui mal-aysement se pourra faire, sinon par le changement d’urdre ; et il semble qu’il seroit expedient d’en retirer quelques-uns dans les villes, comme par exemple le monastère d’Entremont à la Roche, pour y accroistre le nombre des chanoines, et y establir un notable service, avec un théologal et penitencier, ayant esgard au voisinage et au commerce de ceux de Geneve avec les habitans de la Roche.

On pourroit aussi en convertir d’autres en des Congrégations de Prestres de l’Oratoire, par exemple, le monastere du Sainct-Sepulchre de la ville d’Annecy; et les autres, les annexer au college de la mesme ville, comme le prieuré de Pellionex.

Or, ce qui est dit, de retirer quelques monastères dans les villes pour accroistre le nombre des chanoines, regarde le bien de la noblesse de tout le pays de Savoie, laquelle est nombreuse et en quantité, mais la plupart pauvre, et n’a aucun moyen de loger honnorablement ses enfans qui veulent estre d’Eglise, sinon dans les benefices qui se distribuent dans le pays, comme sont les cures et les canonicats, lesquels on pourroit introduire sainctement de ne devoir estre distribuez que par le concours aux gentils-hommes ou docteurs.

Son Altesse donc, pour ce regard, pourroit faire une instruction à son ambassadeur, pour obtenir de Sa Saincteté une comtnission à l’archevesque de Tarentaise, evesque de Maurienne, et à celui de Geneve, pour procéder aux establissemens susdits, en sorte neantmoins que l’un, de ces prélats se treuvant absent, les deux autres puissent procéder, et les procureurs, général et patrimonial, chargez de tenir main à l’execution en toutes occurrences, avec expresse recommandation au Sénat d’assister en toutes les occasions qui le requerroient.